13.08.2022

Ukraynanın Krım əməliyyatı - Rusiyaya inamsızlıq və psixoloji çöküş

Ukrayna ordusunun Krımdakı Rusiyaya məxsus aerodroma raket zərbələri endirməsi Ukrayna-Rusiya müharibəsində yeni mərhələyə start verdi. Həmin raket zərbələri Krımı və Rusiya nəzarətindəki Ukrayna torpaqlarını və orda yaşayan əhalinin təhlükəsizlik və psixoloji vəziyyətini ortaya qoydu.

Krım əhalisi əziyyət çəkir və əsas səbəb müharibə deyil. Rusiya Krım zəbt edəndən sonra ora məskunlaşmaq üçün əhali köçürməyə başladı. Həmin əhaliyə müəyyən vədlər vermişdi. Ancaq əhalinin həyat şəraitinin pis olması, su qıtlığı, yol problemi, ümumiyyətlə, verilən sözlərə əməl edilməməsi belə desək ordakı əhalini "tikan üstündə" saxlayırdı. Məsələ ondadır ki, Krımdakı aerodroma endirilən raket zərbələri əhalinin var olan problemlərinin üzərinə birini də əlavə etdi - Təhlükəsizlik! Yəni, artıq Rusiya nəzarətindəki bölgədə yaşayanlar anlamağa başladı ki, onların təhlükəsizliyi qorunmur.

12.08.2022

Rusiyanın gözünü dikdiyi ZƏNGƏZUR: Kreml tarixi Azərbaycan torpağı üçün hərəkətə keçir - Səxavət Məmməd yazır

Qarabağ ətrafında cərəyan edən proseslər onu deməyə əsas verir ki, mövzu “Qarabağ problemi”ndən çoxdan çıxıb. Hazırda əsas məsələ Zəngəzurla bağlıdır.

Rusiyanın Ukraynaya təcavüzü, ABŞ və Avropa ölkələrinin Rusiyaya tətbiq etdiyi sanksiyalar şimal qonşumuzun iqtisadiyyatına ciddi təsir göstərir. Rusiya cənub və şərqə baxmağa məcburdur. Yəni Ukraynaya təcavüz faktı olmasaydı və Qərbin sanksiya məngənəsində sıxılmasaydı, çətin ki yönünü cənuba və şərqə tutardı. Bu həm də o anlama gələcəkdi ki, Rusiya Qarabağda istədiyi kimi davranacaqdı. İstədiyi vaxt gərginliyi artırıb, istədiyi vaxt azaldacaqdı. Beləcə təkcə münaqişəni yox, həm də bölgəni idarə edəcəkdi.

10.08.2022

"Qisas"ın Ermənistanda yaratdığı xof və Azərbaycanın atmalı olduğu addımlar - Səxavət Məmməd yazır

Ağıllı düşünənədək dəli vurub çayı keçir.

Qarabağ ətrafında baş verənlər də təxminən belədir. Uzun illərdir Azərbaycan tərəfi düşünərək, hesablayaraq bir şeylər etməyə çalışırdı. Ancaq erməni tərəfi bir addımla, dəliliklə Azərbaycanın gündəmini müəyyən edirdi.

4.08.2022

"Qisas"la nəticələnən proses: Hansı şəraitdə şəhid vermişik və yüksəkliklərin önəmi nədədir? - Səxavət Məmməd yazır

Bir neçə gün idi ki Qarabağda gərginliyin olduğu sezilirdi. Hər iki tərəf vəziyyətin stabil olduğunu söyləsə də, alınan informasiyalar tam əksini deyirdi. Yaranmış gərginlik dünən məntiqi sonluqla yekunlaşdı.

Azərbaycan ordusu iki istiqamət üzrə – Sarıbaba və Qırxqız istiqamətində xüsusi əməliyyat keçirərək ərazini nəzarətə götürdü. İşğaldan azad edilmiş ərazilərdə mühəndis-istehkam işləri və təminat yollarının çəkilməsi prosesi davam edir.

Bunlar nəticədir. Gələk səbəbə…

1.08.2022

Qarabağda müharibənin başlaması niyə real deyil? - Səxavət Məmməd yazır

Demək olar ki, hər gün “Müharibə başlayacaq” anonsları eşidirik.

Məsələ ondadır ki, müharibənin başlaması üçün müəyyən şərtlər lazımdır. Birbaşa gələk Qarabağ məsələsinə. Hesab edirəm ki, Qarabağda müharibənin başlaması üçün bütün hədlər keçilməyib. Birincisi, siyasi böhran pik həddə çatmayıb. Yəni tərəflərin XİN rəhbərləri yaxın zamanda ən son Gürcüstanda görüşə bilmişdilər. Həmin görüşdən sonra isə müsbət bəyanatlar verilmişdi. 44 günlük müharibədən öncəki dönəmə nəzər salsaq, tərəflər, demək olar, aylar idi ki, görüşmürdü. Siyasi böhran müharibənin olacağını açıq şəkildə deyirdi. Müharibədən əvvəl Azərbaycan tərəfinin Ermənistan tərəfinə göstərəcəyi yumşaq gücü belə yox idi. Əldə yalnız BMT-nin 4 qətnaməsi var idi. O qətnamələr yumşaq idi, ancaq heç bir gücü yox idi. Məsələ ondadır ki, hazırda Azərbaycan tərəfinin əlində yumşaq gücü var və bu tüknməyib. Məntiq və müharibə qanunauyğunları onu deməyə əsas verir ki, hazırkı gərginliyin süni çalarları çoxdur.

26.07.2022

AzTV-nin tənqid imitasiyası, AMEA-nın "demokratiyası" - Səxavət Məmməd yazır

Avropa ölkələri, xüsusilə Almaniyanı tənqid yönündə formalaşan AzTV-nin tənqid “maşını” bəlkə də ilk dəfədir ki, ölkəyə ayaq açıb.

AzTV ilk Azərbaycan Milli Elmlər Akademiyasını hədəf seçib. Əslində AzTV-nin AMEA-nı tənqid etməsi Almaniyanın dağılması qədər uğurlu alınıb.

Antiterror əməliyyatları harada keçirilməlidir? - “Yenidən müharibə ehtimalı”… - Səxavət Məmməd yazır

Qarabağ müharibəsinin aktiv fazası bitəndən sonra sayını itirmişəm, artıq neçənci dəfədir ki, yeni müharibənin başlayacağını deyirlər, yazırlar.

Konkret bir səbəb göstərilir mi? Yox!

Bu cür müharibə ehtimalının cəmiyyət arasında artması iki səbəbdən baş verir.

15.07.2022

Məmurların “dejurnı” veteranlardan mədət umması – Səxavət Məmməd yazır

Azərbaycan bəlkə yeganə ölkədir ki, qazilər, şəhid ailələri və əlillərlə bağlı məsələlərdə başqa dövlətlərin təcrübəsinə müraciət etməməlidir. Çünki Azərbaycan nəinki müstəqillik dövründə, hətta müstəqilliyin bərpasından əvvəl də şəhidlər verməyə başlayıb. O baxımdan, müharibə veteranı və əlilləri də ölkənin müstəqillik tarixi ilə eyni yaşdadır.

Bu ölkə şəhid ailələri, qazilər və əlillərin problemləri ilə böyüyüb. İndiyə qədər Azərbaycan ya özü təcrübə toplamalı idi, ya da xarici təcrübəyə müraciət edəcəkdisə, bu addımı çoxdan atmalıydı. Qısası, Azərbaycan ikinci müharibəyə və postmüharibə dövrünün problemlərinə çoxdan hazır olmalı idi. Hazırdırmı? Qətiyyən!

13.07.2022

Canından bezdirilən qazilər, “Xan” tövrü göstərən məmurlar və günahkar çıxarılan cəmiyyət - Səxavət Məmməd yazır

Müharibənin aktiv fazası bitdi, canı, qanı bahasına torpaqları işğaldan azad edənlərə, ölkənin ərazi bütövlüyünü bərpa edənlərə qarşı sanki bir səlib yürüşü aparılır. Bir çox qazilər baş verənlərə məntiqli cavab tapmadığı üçün belə deyirlər: “sanki düşmənə yox, bəzilərinin qohumlarına güllə atmışıq, ona görə bizə qarşı belə davranırlar”.

Açığı mən də baş verənlərə məntiqli cavab tapa bilmirəm. Hərdən düşünürəm ki, bəlkə “barıtını çox etmişik”. Müharibə vaxtı “Hər şeyə görə əsgərlərimizə borcluyuq”, – deyirdilər. Düşünürdük ki, o əsgərlər müharibə bitəndən sonra üstümüzə veteran, əlil kimi qayıdanda, onları əl üstündə saxlayacaqlar.

7.07.2022

Ortaya atılan ev məsələsinin bizə unutdurduqları - Səxavət Məmməd yazır

Müğənni Roza Zərgərlinin övladlığa götürdüyü Corc Qafarova ev verilməsi ölkədə ən çox müzakirə olunan mövzuya çevrilib.

Ev verilən şəxsin Roza Zərgərlinin oğlu olması məsələni bir qədər başqa istiqamətlərə çəkir.

Roza Zərgərlini nə səsindən, nə üzündən, nə də əndamından tanıyıram. Yazacaqlarımın da nə Zərgərliyə, nə də Qafarova aidiyyəti var.

Ölkədə xeyli adam ev məsələsinə görə Roza Zərgərlinin oğlunu dəstəkləyir: Uşaq evində qalıb, əziyyət çəkib, fəhlə kimi işləyib, küçələrdə yaşayıb. Əslində, bunu deyən adamlar hədəfi düzgün nişan alırlar, ancaq mərmini başqa yerə atırlar.

4.07.2022

Bir yandan bahalıq, bir yandan məmur özbaşınalığı: Əhalini boğaza yığanların yeni oyunları - Səxavət Məmməd yazır

Aylardır ki, insanlar quru sərhədlərinin açılmasını gözləyir. Tək açıq olan quru sərhədini də bağlayırlar. Cavabdeh qurumların hamısı da ağzına su alıb oturub. İnsanların Türkiyəyə ucuz gedə biləcəyi yolu da bağlayırlar ki, ancaq bahalı uçmaq olar. Bahalı həyat yaşayırıq axı. Adını qoyacaqlar ki, meymunçiçəyi təhlükəsinə görə bu addımı atıblar. Meymun da bilir ki, meymunçiçəyi hava yolu ilə yayılmır, ancaq yaxın təmasla, özü də lap yaxın təmasla keçə bilir, ancaq bizim “çiçəklər” bunu bilmir…

30.06.2022

Ermənistanın danışıqlı döyüşü və ya ikiüzlü siyasətə necə cavab verməli? - Səxavət Məmməd yazır

Qarabağ müharibəsinin aktiv fazası geridə qalandan sonra Rusiya sülhməramlılarının nəzarəti altındakı bölgələrimizdə hələ də qanunsuz erməni silahlı dəstələri xidmət aparmaqdadır. Bununla bağlı Azərbaycan tərəfi bir neçə dəfə etiraz səsini ucaltsa da, heç bir nəticə verməyib.

Hazırda Ermənistanla Azərbaycan arasında müəyyən danışıqlar baş verir. Delimitasiya komissiyası yaradılıb, kommunikasiyanın açılması üçün cəhdlər var, ancaq müsbət sayıla biləcək bu halların qarşılığında Paşinyan birdən-birə, belə desək, “valı dəyişdi”.

28.06.2022

Müdafiə nazirinin gündəm olmayan MÜSAHİBƏSİ: Zakir Həsənovun bir-birinə zidd açıqlamaları - Səxavət Məmməd yazır

Müdafiə naziri, general-polkovnik Zakir Həsənov Azərbaycan Respublikası Silahlı Qüvvələri günü münasibəti ilə AzTV-yə müsahibə verib.

Düşünürəm ki, hər bir ölkənin müdafiə nazirinin verdiyi geniş müsahibə müzakirə mövzusuna çevrilir və çevrilməlidir. Azərbaycanda, nədənsə, belə müzakirələr açılan kimi dərhal biriləri ortaya çıxır, tənqid edənləri topa tutur. Müxtəlif arqumentləri də var. Misal üçün, müdafiə nazirini tənqid etmək üçün, gərək, mütləq general, ya da hərb elmi üzrə akademik olasan. Bu tip adamların düşüncəsinə görə, Lenini tənqid etmək üçün SSRİ qurmalıyıq…

15.06.2022

Azərbaycan ordusunun Türkiyə modelinə KEÇİDİ: Qət edilən məsafəyə və "stop"lamaya tarixi baxış - Səxavət Məmmədin ARAŞDIRMASI

Azərbaycan ordusunun Türkiyə ordu modelinə keçidindəki problemlərə toxunarkən bəziləri elə düşünür ki, hazırda baş verənlər Azərbaycan ordusu üçün yenilikdir və ona görə bu çətinliklər baş verir.

Azərbaycan ordusunun keçmək istədiyi modelin adını Türkiyə modeli, NATO standartlarına uyğun ordu modeli qoya bilərik. Adın hər nə olmasından aslı olmayaraq, bu, dünyada müasir ordu modeli sayılır. Bütün ölkələr bu keçidi bir formada təşkil edir.

Bu modelin Azərbaycandakı inkişaf mərhələsinə baxmaqda fayda var.

14.06.2022

Ordunun Türkiyə modelinə keçidinin önündəki MANEƏLƏR: Kimlər prosesə əngəl olur? - Səxavət Məmməd yazır

Türkiyə modelinə keçidlə bağlı problemlərin aktuallığını nəzərə alaraq yenidən bu mövzuya müraciət etmək qərarına gəldim.

Azərbaycan ordusunun Türkiyə modelinə keçidinin görüntüsü, demək olar ki, yaradılıb. Ştat strukturu olaraq, mexanizm olaraq bütün hərbi qurumlarda sənəd üzərində Türkiyə modelinə keçidi görəcəyik. Reallıqda isə bu hələ də arzu olaraq qalır. Türkiyə ordusuna baxanda görürük ki, rüşvət sözü Türkiyə ordusunda 1 kilometrliyinə belə yaxın düşə bilməz. Məsələ ondadır ki, Türkiyə ordusunda hərbçilərin təminatları, onlar ordudan tərxis olunandan sonra statusları, xidmətdə olan dövrdə hərbçiyə, onların ailələrinin sosial təminatına yanaşma da Azərbaycan ordusundan çox fərqlidir. Modelə keçid baş tutursa, bunlar da baş tutmalıdır.

7.06.2022

Azərbaycan ordusu üçün ağrılı PROSES: Türkiyə modelinə keçid nə üçün bu qədər sancılı olur? - Səxavət Məmməd yazır

Bütün keçidlərin sancılı olduğu deyilir.

Müharibədən sonra Azərbaycan ordusu yeni modelə – Türkiyə modelinə keçidə start verdi. Əslində, bu keçidin əsası rəsmi elandan çox əvvəl qoyulmuşdu. Azərbaycan ordu mənsublarını yetişdirmək üçün Türkiyə ilə sıx əlaqə qururdu. Bu əlaqənin tarixi 1992-ci ildən başlayır. Azərbaycanda kadr yetişdirmək üçün tədrisdə Türkiyə ədəbiyyatına daha çox xitab olunurdu. Türkiyənin hərbi nəşrləri tərcümə olunurdu. Yəni Azərbaycan ordusu mənsublarının böyük hissəsi Türkiyə təhsillilər sayıla bilər. Uzun illər davam edən əməkdaşlıq fonunda keçid bu qədər sancılı olmamalı idi.

2.06.2022

Üç müharibə iştirakçısına 9 aydır pensiya verilmir - Səxavət Məmməd Tərlan Eyvazovdan yazır

Bunları yazdığıma görə, bəlkə də, hərbi ekspert, üç müharibə iştirakçısı olmuş Tərlan Eyvazov məndən inciyəcək…

İncisə də, inciməsə də, bunları yazmağı özümə borc bilirəm.

Öncədən bildirim ki, Tərlan Eyvazov həm də rəssamdır. O, bir neçə gün əvvəl “Yorulmuş əsgər” tablosunu sosial şəbəkədə paylaşmışdı.

Tərlan Eyvazov tablosunun üzərinə həm də gözəl bir yazı həkk etmişdi. O yazıya əl gəzdirmək günahdır, ona görə öz yazdığı kimi də təqdim edirəm:

“Dincəl əsgər, döyüşlər yordu səni…

1.06.2022

Rusiyanın vassalına çevrilmiş Belarus: Xalq Lukaşenko bəlasından qurtula biləcək?

Rusiyanın Ukraynaya təcavüzü təkcə iki ölkəyə yox, həm də qonşu ölkələrə ciddi təsir edir. Ukraynaya qonşu olan bir çox ölkə Rusiyanın təcavüzünü pisləyib onun qarşısında yer alsa da, Belarus seçimini Rusiyadan yana etdi.

Əslində, bunda da qeyri-adi bir şey yoxdur. Çünki Belarusdakı hakimiyyətin qoruyucusu və havadarı Rusiyadır. Müharibə başlayanda Belarusun aktiv döyüşlərə qatılacağı gözlənilsə də, bu baş vermədi. Belarus xalqın sərt reaksiyası qarşısında buna getməkdən çəkindi. Əvəzində isə ərazisini Rusiyaya tamamilə açdı. Rusiya Belarus ərazisindən hücumlar həyata keçirdi. Mövzunu açmağımızda səbəb isə son günlər Belarus ərazisindən Ukraynanın raketlərlə vurulmasıdır.

26.05.2022

Qarabağ məsələsində unudulan məqamlar və ya biz nədən danışırıq? - Səxavət Məmməd yazır

Çırmanarıq keçməyə çay gəlməmiş,

Başlayırıq qızmağa yay gəlməmiş.

Brüssel görüşündən sonra yenə insanlara ümid paylayırlar. Zəngəzur dəhlizini açırlar, sərhəddi bərpa edirlər, Avropa İttifaqını və ABŞ-nı hakim təyin edirlər, Rusiyanı qovub ərazidən çıxarırlar.

23.05.2022

Absurdistan: - Səxavət Məmməd yazır

Bura Absurdistandır. Burada “vur” deyəndə öldürürlər.

Burada öz ayıbına kor olub başqalarına gülürlər.

Burada oğru doğrudan daha möhkəm qışqırır.

Ümumiyyətlə, burada məntiq axtaranda ağıl yoxdur…

Rusiyanın Azərbaycana qondarma rejimin müstəqilliyini tanıma təhdidi... - Səxavət Məmməd yazır

Rusiya Azərbaycanla nə qədər müttəfiqlik bəyənnaməsi imzalasa da, reallıqda düşmənçilik siyasəti aparır.

Rusiya sülhməramlıları Qarabağa yerləşdikdən sonra 10 noyabr bəyanatının heç bir bəndinə əməl olumayıb.

Bundan əlavə, Rusiya Azərbaycana qarşı törətdiyi bütün əməllərin yalnız arxasında var idi, reallıqda bunu Azərbaycanın potensial erməni vətəndaşları törədirdi.

Bilirdik, ancaq sübutumuz yox idi.

14.05.2022

Şuşaya getmək davası: Bülbüloğlunun baxilinin bizə unutdurduqları - Səxavət Məmməd yazır

Hər şeyimiz saxtadır, etirazımız belə şəxsi mənafeyimizdən o yana keçmir.

İlyarımdır Şuşa döyüşləri bitib, ancaq Şuşaya getmək yolundakı döyüşlər səngimək bilmir: "Şuşaya onu niyə aparırlar?", "Şuşaya məni niyə aparmırlar?", "Polad Bülbüloğlu baxil geyinib, mən getsəm, torpağı alnıma sürtərdim"....

Rusiyanın Qarabağda körüklədiyi ATƏŞ: Azərbaycan ordusu tam döyüş vəziyyətinə gətiriləcək - Səxavət Məmməd yazır

Köhnə peşənin yeni versiyası.

Azərbaycan-Ermənistan Dağlıq Qarabağ münaqişəsinin tarixinə bnəzər salsaq, tərəflər arasında hansısa razılığın əldə olunma ehtimalı yarandığı zaman Ermənistanda mütləq hakimiyyət çevrilişi baş verib. Hazırkı reallıq ondan ibarətdir ki, tərəflər sülhlə bağlı müsbət fikirlər səsləndirir. Şifahi razılığın olduğunu da deyə bilərik. İlk dəfə Ermənistan Nikol Paşinyanın dili Azərbaycanın ərazi bütövlüyünü tanıdığını bəyan etdi.

44 günə Qarabağı azad edənlərin il yarımlıq veteranlıq çiləsi - Səxavət Məmməd yazır

Müharibə bitər-bitməz döyüşdə iştirak edən hərbçilərə medallar verildi. Medallar verilən zaman ədalətsizlik olduğunu dəfələrlə yazmışdıq. Müharibənin üzərindən il yarım keçəndən sonra veteranlıq statusu verilməyə başlandı. Təbii ki, bu məsələ də birmənalı qarşılanmadı. Çünki müharibəyə görə rayonların işğaldan azad edilməsi ilə bağlı medal almış bir çox şəxs veteran statusu ala bilmədi. Çünki həmin şəxslərin adları döyüş əmrinə salınmamışdı. O medallar hansı əsasla verilmişdi? Birbaşa döyüşdə iştirak edənlərin belə bir problemi olmasa da, xüsusilə Hərbi Hava Qüvvələri, Hava Hücumundan Müdafiə Qoşunlarında veteranlıq məsələsi döyüş əmrinə adların salınıb-salınmamasına görə narazılıqla qarşılandı.

Aşkarlanan insan qalıqları: Onların kimliyinin müəyyənləşdirilməsindəki çətinliklər - ARAŞDIRMA

Qarabağ müharibəsinin aktiv fazası yekunlaşıb.

Qarabağ müharibəsinin aktiv fazasının yekunlaşması, işğal altındakı torpaqların 70 faizdən çoxunun azad olunması ilə Birinci Qarabağ Müharibəsi, onun nəticələri, itkin düşmüşlər və əsir götürülənlərin taleyi gündəmə gəlir.

Rusiya Qarabağ probleminin "açar"ını öz əlindən buraxmaq istəmir - Səxavət Məmməd yazır

İkinci Qarabağ Müharibəsinin nəticəsi özü ilə birgə yeni reallıqlar da gətirib.

Tərəflər yeni reallıqlara ayaq uyduraraq siyasətlərini qururlar.

Bu siyasət yaxın, orta və uzaq vədəlidir.

Ədəbiyyatı, yazmağı qapazaltı edənlərə bir neçə söz və nöqtə - Səxavət Məmməd yazır

Yazıçı olmasam da…

44 günlük müharibə ilə bağlı niyə ədəbi nümunələr yazılmır, niyə filmlər çəkilmir deyə müxtəlif çaplı suallar ünvanlanır. Qeyri-ciddi ittihamlar, iradlar, boşboğazlıq.

Sadalananlar dəqiq ünvanına yönəlsəydi, heç bir problem olmazdı. Ancaq “çapsız” adamların kitab çapının hansı qiymətə olduğundan xəbəri yoxdur. Ümumiyyətlə, bəzi adamlar “çapı” qədər danışsa, daha yaxşı olardı.

Ordumuzun Qarabağdakı yerdəyişməsi: İrəliləməyin iki versiyası - Səxavət Məmməd yazır

Azərbaycan ordusunun Qarabağda mövqelərini dəyişməsi qeyri-adi hadisə deyil.

Əslində, ərazidə baş verənləri izah etmək üçün bir qədər geriyə, müharibədən əvvəlki dönəmə getmək istəyirəm...

Rusiyanın Xocalıda törətdikləri və Buça qətliamı: Tarix təkərrür edir, bəs günahkar yenə cəzasız qalacaq? - Səxavət Məmməd yazır

Rusiya ordusunun geri çəkilməsindən və ya geri oturdulmasından sonra Buça şəhərindən yayımlanan görüntülər Xocalı faciəsini yenidən gündəmə gətirir. Əslində, Azərbaycan üçün bu, gündəmdən heç vaxt düşməyib, ancaq məsələyə hələ də siyasi, hüquqi qiymət verilməyib. Buçadakı görüntülər, bəlkə də, Xocalıda da törədilənlərin hüquq müstəvisinə daşınmasına təkan verə bilər.

Fərruxda tapılan insan qalıqları və qeyri-müəyyənliklər barədə - Səxavət Məmməd yazır

Fərrux dağında Azərbaycan ordusu mövqe tutandan sonra ərazidə insan qalıqları aşkar edilib. Azərbaycanda hər mövzuda olduğu kimi bunda da müxtəlif iddialar ortaya atıldı. Hətta, “Xocalıda qətlə yetirilmiş insanların cəsədlərini gətirib Fərruxda basdırıblar”, – deyənlər belə tapıldı.

Öncə qalıqların üzə çıxması barədə. Birinci Müharibəni arşadıran zaman şəxsən mənə aydın olmuşdu ki, əslində, Qarabağda döyüşlər, mövqelər 1918-ci ildəkinin üzərində qurulub. Yəni yeni səngərlər qazılmayıb. Zamanında var olan səngərlər yenilənib. Bu səngərlərin Mərzili kəndinin üst hissəsində şahidi olmuşam...

Fərrux dağı və kəndi ətrafında gəzən söhbətlərə sözardı... - Səxavət Məmməd yazır

Fərrux dağındakı yüksəkliklərdə Azərbaycan ordusunun mövqe tutması o anlama gəlir ki, Fərrux kəndindən Azərbaycan ordusu çıxa bilməz, hətta çıxsa belə, o kənddə hansısa silahlının qalması mümkün deyil, intihara meyillilər xaric. Fərrux kəndi eyniadlı dağın yamacında, Xaçın çayının sahilində yerləşir. Yüksəklikdə kim oturubsa, təkcə o kəndə yox, ətraf kəndlərə də nəzarət edir deməkdir. Bunu birdəfəlik anlamaq lazımdır.

Rəsmi Moskva Bakı ilə hesablaşır: Azərbaycanın incə siyasətinin "Fərrux" nəticəsi - Səxavət Məmməd yazır

Siyasət nəticə sənətidir!

Müharibədən sonra Azərbaycan cəmiyyəti haqlı olaraq tam nəzarətə götürülməyən ərazilərlə bağlı narahatlığını dilə gətirirdi.

Azərbaycan tərəfi isə hiss olunurdu ki, məqam axtarır. Ermənistanı sülhə məcbur etmək üçün dövlət sərhəddi istiqamətində müəyyən işlər görülür, uzun illər sonra hücum diplomatiyasına üstünlük verirdi.

Qarabağda gözlənilən hərbi əməliyyatlar: Bəs Rusiya sülhməramlıları? - Səxavət Məmməd yazır

Ukraynda baş verən müharibə Qarabağda baş verən və verəcək prosesləri bir qədər arxa fonda qoyub.

Düşünürəm ki, Qarabağda baş verənlərin arxa fonda qalması özü də yaxşı əlamətdir. Çünki görülən və görüləcək işlərə cəmiyyətin münasibəti o qədər qeyri-adi olur ki, bəzən bu, prosesin zərərinə də işləyir. Artıq heç kimə sirr deyil ki, Azərbaycan tərəfi Qarabağın işağldan azad edilməmiş ərazilərində psixoloji müharibə aparır. Yüksək səslə qarşı tərəfə Azan, himn və uvertüra dinlədilir. Bu, əslində, o analama gəlir ki, yaxın gələcəkdə bu səslərə qulaq asmalı olacaqsınız. Ya indidən öyrənin, yaşayın, eşitmək istəmirsinizsə, mülklərinizi satıb gedə bilərsiniz.

6.03.2022

Putin Zelenskinin ölüsünü yox, sınmış vəziyyətdə qarşısında dayanmasını istəyər - Səxavət Məmməd yazır

Artıq Rusiya-Ukrayna müharibəsinin səkkiz günü geridə qalır.

Bu günlər ərzində nə gördük?

Müharibələrdə, adətən, ilk iki-üç gün son dərəcə şiddətli və daha çox itkilərlə yadda qalır. İlk iki-üç günün nəticəsinə görə Rusiya ordusunun quru qoşunlarının çətinlik çəkdiyini gördük. Düşünürəm ki, bunun iki səbəbi ola bilər. Birinci səbəb Rusiya Silahlı Qüvvələrinin quru qoşunlarının döyüş hazırlığının aşağı səviyyədə olmasıdır. Rusiya ordusu son 10 ildə modernləşdirmə üzərində işləyirdi. Ancaq hiss olunur ki, bu, istənilən səviyyədə həyata keçirilməyib. İkicisi, Rusiya tərəfi Ukrayna ordusunu ciddiyə almayıb. Ötən yazıda da qeyd etmişdim ki, Rusiya bunu ön görsəydi, 150 min yox, ilk mərhələdə daha böyük qoşun yeridərdi.

Tüpürülən dəyərlər: Gizli və açıq fahişəliyin müharibə örnəyi - Səxavət Məmməd yazır

Rusiya-Ukrayna müharibəsi, əslində, bu günə qədər yazılmış, müdafiə edilmiş, bizə aşılanmış bütün dəyərlərin sadəcə maraqların toqquşmasına qədər keçərli olduğunu göstərir.

Bəli, Rusiya işğalçıdır, qınamaq lazımdır. Bunu etməyin yolu qarşısında durmaqdan keçir. Rusiyanın işğalçı, imperialist olduğunu mütləq Ukraynanı işğal etməyə başlayanda görmək lazım idi?

Qərb mediası gəlib istənilən bir Azərbaycan vətəndaşına sual versə, 20 Yanvar faciəsindən, Xocalıdan, Qarabağın işğalından bol-bol danışacaq. Ukraynada yaşananlar yeni bir şeydir? Yox! Axşam Türkiyə kanallarında ukraynalıların qaçmasını göstəriblər. Anam zəng elədi ki, onlara baxanda o günlərə qayıtdım, balaca bacın qucağımda, sən də yanımızda – topun, raketin altında qaçırdıq, axşam onları görəndə eyni hala düşdüm.

Rusiya-Ukrayna savaşının ÇİRKİN ÜZÜ: Riyakar siyasətin acı reallığı - Səxavət Məmməd yazır

Ukrayna-Rusiya müharibəsinin artıq beşinci günü geridə qalıb. Geridə qalan beş gün ərzində Rusiya ordusunun, xüsusilə Xarkov, Kiyev və Mariopol şəhərinə hücumlarını müşahidə edirik.

Rusiya xəritə üzərində planladıqlarına döyüş meydanında nail olmasa da, hücumlarına davam edir, ancaq informasiya müharibəsində konkret şəkildə məğlub olur. Belə bir deyim var, savaşı qazanıb  informasiya müharibəsində uduzsan, məğlub sayılacaqsan. Ukrayna, daha dəqiq desək, Qərbin informasiya maşını elə bir vəziyyət yaradıb ki, Ukrayna məğlub olsa belə, qalib sayılacaq. Hətta bu yöndə də bilərəkdən təbliğat gedir. Yəqin, siz də buna çox rast gəlmisiniz: “Ukrayna müharibədə uduzsa da, Zelenski, Ukrayna xalqı gözümüzdə qalib sayılacaq”.

Rusiyaya lənət oxuyan "İMPERİALİSTLƏR": "Adamın içində yaranan ümid..." - Səxavət Məmməd yazır

Rusiya əleyhinə səslənən fikirlərə baxıram, adamın içində bir ümid yaranır. Ukraynaya dəstək mesajları da həmçinin.

Ölkədə imperializm lənətlənir, işğalçılıq pislənir. Adamın ürəyi dağa dönür. Ancaq bunun da bir əmması var.

Kimə sual verirsən ki, Rusiya ilə mübarizə etmək üçün nə etmisən? Hamısı ya söyür, ya da qarğış edir. Konkret əmələ gələndə isə hərəkətsizlik açıq şəkildə görünür.

Ukrayna məsələsində xalq olaraq safımızı seçmiş görünürük. Ən azı bunu sosial şəbəkədə görə bilirik. Bəs əməli olaraq imperializm, işğalçılar əleyhinə nə etmişik? Şəkil paylaşıb, status yazmaqdan başqa nə etdiyimizi soruşuram. Deyəcəklər ki, bunu dövlət etməlidir. Boş və mənasız cavabdır.

Moskva Bəyannaməsi Rusiya üçün bir şansdır... - Səxavət Məmməd yazır

Moskva Bəyannaməsi əslində, Rusiya üçün bir şansdır.

Azərbaycan əhalisinin böyük əksəriyyəti Rusiyaya qarşı aqressivdir və bütün bəlalarının səbabkarı kimi məhz Rusiyanı görür. Haqsız da deyillər. Niyə Azərbaycan xalqının hamısı yazmadım? “Roma papasından daha çox katolik” misalı Azərbaycanda da rusdan daha çox ruspərəst klounlar (5-ci kalon) var.

Açığı, aylar öncə yazıların birində belə bir fikir səsləndirmişdim: “Elə bir dönəm gəlib ki, balanslaşdırılmış siyasət keçərli olmayacaq, elə, ya da belə tərəfini seçmək məcburiyyətinə qalacaqsan. Xoşluqla olmasa da, buna məcbur edəcəklər”.

Müharibədə könüllülüyün nə olduğunu bilməyənlər üçün bir neçə söz - Səxavət Məmməd yazır

İl olub 2022. Azərbaycan Birinci Qarabağ müharibəsində itirdiyi ərazilərin böyük hissəsini hərbi yolla işğaldan azad edib. Ancaq insanların təfəkkürü, düşüncə tərzi və hadisələrə münasibəti birinci müharibəyə münasibətdən zərrə qədər fərqlənmir.

Görünən odur ki, Azərbaycan dövlət olaraq qazandığı hərbi qələbənin propaqandasını düzgün qura bilməyib. Əlində olan informasiya resurslarından doğru şəkildə istifadə etmir.

Bu məsələni bir qədər açım. Birinci müharibədən sonra insanlara irad tutula bilməyəndə, müharibədə iştirak etmədiyi məlum olanda dərhal onun üzərinə bununla gedirdilər: “Niyə gedib döyüşməmisən? Niyə oğlanların döyüşməyib? Niyə qohumlarından şəhid olanı, yaralananı yoxdur?“. Bu cümlələrdən istənilən birini deməklə istənilən şəxsi məzəmmət etmək olardı. Cümlələri keçmiş zamanda yazsam da, əslində, bu, indiki dönəmdə də keçərlidir.

"Qanunsuz" səfərlər və ya niyə vətənimdə azad gəzəmmirəm? - Səxavət Məmməd yazır

Kimliyindən asılı olmayaraq, Azərbaycan vətəndaşının, qarabağlının Qarabağda saxlanılması mənə həmişə çox pis təsir edir. Bəli, deyəcəklər ki, mina var, həyati təhlükə mövcuddur və qadağalar da ona görədir. Bunu da, haradasa, anlamaq olar.

Məsələyə bir də mənəvi yöndən baxanda, həqiqətən də, biabırlıqdır. İnsan öz doğulduğu torpağa getdiyi üçün saxlanılır, üzr istəmə videosu yayımlanır. Bir şeyi anlaya bilmirəm, üzr videoları nəyə lazımdır? Bunu edənlər, etdirənlər hansı travmaları yaşayıblar ki, insanları üzr istəməyə məcbur edirlər?

Rusiyanın əmriylə yol bağlayan ermənilər: MN və XİN-in susqunluğu - Səxavət Məmməd yazır

Ölkə Ramiz Mehdiyevi müzakirə edir, Rusiyanın Ukraynaya hücum edib-etməyəcəyi barədə mərcləşir, Tahir Kərimlinin əjdahasını lağlağıya qoyur, ancaq Qarabağdakı ermənilər yol kəsir, Azərbaycana məxsus maşın karvanının Kəlbəcərə getməsinin qarşısını alır.

Ölkədə müzakirə edilən məsələlər arasında ən sevdiyim, ən bəyəndiyim isə TIR sürücülərinin yol bağlayaraq etdiyi etirazdır.

ABŞ-də polis qaradərili şəxsi öldürdükdən sonra ölkəni etirazlar dalğası bürümüşdü. O dönəm prezident olan Barak Obama gənclərə səslənərək etirazlara qatılmalarını istəmişdi. Mətn təxminən belə idi: “Çıxın etiraz edin, fərqi yoxdur, hansı tərəfdə olacaqsınız, əsas odur, etiraz edin. Çünki ABŞ etirazlar üzərində qurulub”. Söz düşmüşkən bunu yazmaya bilməzdim.

MN-də maliyyə maxinasiyaları: Milyonlar necə mənimsənilib? - Səxavət Məmməd yazır

Müdafiə Nazirliyində Dövlət Təhlükəsizlik Xidmətinin keçirdiyi əməliyyat barədə hər kəs məlumatlı olduğu üçün keçirəm mətləbin düz ortasına.

Uzun zamandır ki, Müdafiə Nazirliyində yeyintilərin olması barədə məlumatlar yazılır, pozulur, ancaq buna reaksiya verilmirdi. Veriləndə isə proses bu haqda yazanın cərimələnməsi ilə yekunlaşırdı.

Bəzi şəxslər qələmi əlinə alıb cızma-qara edir ki, bu cür halların çox müzakirə olunması ordunu ləkələyir, ermənilər bu yazılanları oxuyur. Düşünürəm ki, həmin şəxslər ya sifarişli yazır, ya da tip olaraq qorxaqdır. Müharibədə qalib olan ordu niyə erməni düşünməlidir? Ümumiyyətlə, bundan sonra erməni görsə, nə olar, görməsə, nə olar? Əslində, o məhşur erməni dəyirmanına suyu həmin bu tip şəxslər olanları gizlədərək tökür.

9.01.2022

Ordunu ləkələmək istəyənlərin Polad Həşimov "HƏMLƏ"Sİ: Çirkin savaşa rəvac verənlər kimlərdir? - Səxavət Məmməd yazır

Dünya azərbaycanlılarının həmrəyliyi günündən bir gün sonra və Polad Həşimovun ad günündən bir gün əvvəl…

31 dekabrı Həmrəylik günü kimi qeyd edən azərbaycanlılar cəmi bir gün sonra bir neçə yerə bölündü. Şəhid General-mayor Polad Həşimovun anasının açıqlaması ölkədə həmrəylikdən əsər-əlamətin olmadığını ortaya qoydu.

Açıqlamada konkret ittihamlar var. Bu ittihamlarla yanaşı, digər ittihamlar da öz yerini aldı.

İşgəncələrlə gündəmə gələn "Tərtər işi"ndə arxa planda qalan casusluq faktları - Səxavət Məmməd yazır

Adı “Tərtər işi” qoyulmuş məsələnin hər zaman geniş şəkildə araşdırılmasının tərəfdarı olmuşam.

 Prosesə işgəncə faktları daha çox qabardıldığı üçün insanların beynində belə bir fikir formalaşıb ki, casusluq olmayıb, bilərəkdən, planlı şəkildə bu proses orduda həyata keçirilib.

Casusluqla bağlı iki yazı yazandan sonra mənə belə bir ritorik sual ünvanlandı:

Niyə görə casusluqla bağlı indi yazırsan? Sanki hansısa bir prosesə mane oluram. Hətta sifariş aldığımı iddia edənlər də var. Hər kəsin fikrinə hörmətlə yanaşaraq bildirmək istəyirəm ki, hələ “Tərtər işi”indən təxminən 2 ay əvvəl bir yazı yazmışdım və həmin yazıdan bir hissəni sosial şəbəkədə paylaşmışdım.

"Tərtər işi"nə gətirib çıxaran hadisələr silsiləsi və casusluq - Səxavət Məmməd yazır

Casusluq məsələsinə sözardı…

Birinci Qarabağ müharibəsini araşdıran zaman komandir heyəti açıq şəkildə deyirdi ki, keçirəcəyimiz əməliyyatlardan ermənilər əvvəlcədən xəbər tuturdu. Bəzən elə olurdu ki, əlləri ilə qoymuş kimi olduğumuz ərazini vururdular. Ağdamdakı batalyonlardan bir neçəsindən ermənilərə işləyən aşkarlanıb, ölkənin xüsusi xidmət orqanlarına təhvil verilib. Bu, Tərtər istiqamətində baş verib.

Real Time Analytics