Susqun MN, dovşan media, təkərə düşən xalq

Müharibə təkcə səngərdə aparılmır. Səngərdəki müharibə qədər, bəlkə də daha vacibi informasiya müharibəsidir.

 

Dindirəndə qalstuklu müəllimlər ağızıdan köpük dağılana qədər danışacaq ki, informasiya müharibəsində erməniləri qabaqlayırıq, asırıq, kəsirik. Fevral ayının 25-dən bu günə qədər informasiya müharibəsində kimin qalib olduğunu üzülərək gördük. Ermənilər düzgün qurduqları informasiya müharibəsi nəticəsində demək olar ki, Azərbaycanı çaş-baş qoydu. Haqlı olduğumuz halda haqsız duruma düşməyimiz azmış kimi, az qaldı ermənilər cəmiyyətimizi də idarə etsinlər.

Ümumiyyətlə, cəbhədə baş verənlərlə bağlı ilk xəbəri erməni mediasından öyrənməyə adətkar olmuşuq. Bu dəfə də belə oldu. Ermənilər cəbhədə döyüş toqquşması olduğunu bildirəndən sonra AR Müdafiə nazirliyinin mətbuat xidməti döyüş toqquşması barədə məlumat yaydı və əlavə olaraq bildirdi ki, "Döyüş toqquşması nəticəsində itkilərimiz var". Suallar elə məhz bu cümlə ilə başladı. İtkilərimiz nədir? Texnikamı? Əsgərmi? Torpaqmı?

Bu sualların da cavabını ermənilərdən öyrənəsi olduq. Sən demə itkimiz 5 əsgər olub. Bu azmış kimi, ermənilər dərhal ikinci zərbəni vurdu. Şəhidlərimizn adlarını və hərbi vəzifələrini açıqladılar. Hər kəs məlumatı dəqiqləşdirməyə yönəldiyi zaman üçüncü zərbə gəldi. Artıq ermənilər video görüntülər yayaraq əsgərlərmizin nəşlərini göstərdilər. Müdafiə nazirliyi ilə susmaqda davam edirdi. Susaraq informasiya müharibəsi aparan bəlkə də tək dövlətik.

Müdafiə nazirliyinin susması isə vətəndaşlarımızı erməni mediasına, sosial şəbəkələrdə isə erməni səyfələrinə yönləndirdi. Ermənilər təbii ki, özlərinə sərf edən məlumatlar, saxta profillərlə panikalar yaymağa başladı. İnformasiya acı olan insanlar isə istər istəməz baxmır informasiyanı kimdən və haradan qəbul edirlər, dərhal o informasiyanın təsir altına düşürlər.

Hadisənin səhərisi günü cəbhə bölgəsinə yollanırıq. Əvvəlcə Tərtərdə, sonra isə Ağdamın düşmən postlarına bir neçə yüz metr yaxında yerləşən Orta Qərvənd, Çıraqlı, Əhmədağalı, Çəmənli, Qaradağlı, Zəngişalı, Mahrızlı, Əfətli kəndlərində oluruq. Kəndlərin boşaldıldığı xəbəri ilə yüklənən insanlar inanmır ki, bu kəndlər əslində boşaldılmayıb. Hətta bir çox insan yalandan bu məlumatı yaydığımızı da iddia edir. Ermənilər informasiya müharibəsində ardıcıl elə zərbələr vurur ki, vətəndaşlarımız bizi belə yalançılıqda ittiham edir. Əslində isə 25 fevral gecə 03:15-dən başlayaraq cəbhənin bütün istiqamətində atəşkəs pozulur. İri çaplı silahlardan, artileriyadan atəşlər açılır. Kənd sakinləri isə təhlükəsizlik üçün evlərini müvəqqəti tərk edib, kəndin ayağındakı evlərə yerləşirlər.

Təxminən 45 dəqiqəlik döyüşdən sonra sakitliyi görən kənd sakinləri yenidən evlərinə qayıdırlar. Kənd sakinləri ilə söhbət edən zaman demək olar, hamısı bildirdi ki, biz buna öyrəncəliyik. Əslində bu məsələdə də ermənilərin və bizim bəzi ağzıgöyçəklərin ağzın yummaq olar. Kəndlərdə mərmilərdən qorunmaq üçün yeraltı sığınacaqlar tikilməlidir. Əgər mərmilərdən qorunmaq üçün yeraltı sığınacaqlar tikilərsə bu tip xəbələr də yayılmaz və cəbhəyani kənd sakinləri üçün narahatçılığa əsas qalmazdı.

Müdafiə nazirlyinin mətbuat xidməti "Döyüş toqquşması nəticəsində itkilərimiz var" cümləsini işlətdiyindən sonra səssizliyə çəkilir. Artıq əsəblər gərilir, yalanlar, dezinformasiyalar durmadan yayılır, müxtəlif fikirlər səsləndirlir, iddialar irəli sürülür. Yalnız iki gün sonra MN açıqlama ayaraq 25 fevralda 5 əsgərimizin şəhid olduğu xəbərini yayımlayır və şəhidlərin adlarını açıqlayır. Niyə MN məhz iki gün susdu bunun qərargahdakı generallar bilər.

Aprel döyüşləri uşaqdan tutmuş böyüyə kimi hər kəsin içində orduya qarşı güvən gətirdi. Aprel döyüşləri ilə xalqımızın sınmış qüruru bərpa edildi. Ermənilərin məğlubedilməzliyi mifi puç oldu. Ancaq son baş verən hadisələr xalqda MN-ə qarşı inanmıslıq yaratdı. Bəlkə də bunu hansısa qüvvələr bilərəkdən edir

MN susdu, Mətbuat Şurası isə ancaq rəsmi xəbərlərə istinad edilməli olduğumuzu vurğuladı. SUAL OLUNUR, RƏSMI XƏBƏR YOXDURSA HARA ISTINAD EDƏK? İttiham etmək ən asan yoldur. Ermənilərin yayımladığı videoları, məlumatları yayan saytlar ittiham edilir, sosial şəbəkə istifadəçiləri isə erməni dəyirmanına su tökməkdə günahlandırılır. Siz nə zaman məlumat yaydınız və yaxud şərait yaratdınız məlumat yayaq ki, vətəndaşlarımız erməni mediasına üz tutmasın?

Həm düşmənlə informasiya müharibəsi apardığımızı deyirlər, həm də rəsmi xəbərlərə istinad edilməli olduğumuzu vurğulayırlar. Nə zamandan rəsmi qurumlar informasiya müharibəsi aprır? Dünyada belə bir təcrübə varmı? Rəsmi qurumlar özlərinin demək istədiklərini həmişə hansısa jurnalistlərin, blogerlərin dili ilə deyir. Baxın görün ermənilər bunu necə etdi. Erməni blogerlər Azərbaycanda azərbaycanlı jurnalistlərdən daha məhşur olub.

Artıq heç kim Zakaryanın erməni olmasına baxmır, deyirlər, “kopayoğlu cəbhədə nə baş verir hamısını çəkib paylaşır”. Məsələnin əsli isə tamam başqadır. Erməni ordusu bu blogerə kameraların qeydə aldıqlarını verir, o isə videoları montaj edərək şərh edir. Sözü gedən sonuncu videoya diqətlə baxanda görərik ki, videonun əvvəlindəki gecə görüntüsü təpəlik ərazidədir. Videonun 5 dəqiqə 18 saniyəsinə qədər gecə görütüsüdür. Həmin bu müddətə diqətlə baxanda əsgərlər tamam fərqli istiqmətdə hərəkət edir, reylef başdan başa təpəlikdir. Ancaq günüz görüntüsündə, yəni, 5 dəqiqə 19 saniyədən sonra isə əsgərlərimizin nəşləri görüntülənir və əsgərlərimiz düzəngah ərazidədir və mərkəz hissdə. Gecə görüntüsündə əsgərlərimizn hərəkəti ekranın yuxarı hissəsində görsənir. Diqqətlə baxdıqda görünür ki, bu video montajdır. Ancaq hər kəs buna inanır. Ona görə ki, ilk xəbər, ilk zərbə idi.

MN şəhidlərimizin sayını və adlarını açıqlayır. Bunun ardınca isə cəmiyyətə belə bir informaiya buraxılır ki, ermənilərin itkisi bizimkindən bir neçə dəfə çoxdur. Haqlı olaraq cəmiyyət “erməni cəsədlərinin videolarını göstərin, inanaq” deyərək reaksiya verir. Göstərə biləcəyikmi? Varmı bu videolar? Bəlkə də var, ancaq məxfilik deyərək ört-basdır edəcəklər.

Yalnız aprel hadisələri zamanı cəbhə bölgəsində postlara girə bildik. O da inadımız sayəsində. Ermənilər isə postlardan çox rahat reportajlar hazırlayırlar. Bu reportajlar həm cəmiyyəti diri tutur, həm də qarşı tərəfə göz dağı verir.

Mediamıza gəldikdə isə məsələnin ciddiyyətini anlayan media qurumları MN kimi susmağa üstünlük verdi. Danışmaq gümüşdürsə, susmaq qızıldır prinsipi ilə hərəkət etdilər. Ancaq bəzi media qrumları da oldu ki, ermənilərin yaydığı xəbərləri tirajlayır, şəhidlərimizin saylarının çox olduğunu iddia edirdilər. Hətta bəzi saytlar ermənilərin çoxlu sayda itki verdiyi məlumatını elə başlıqlarla tirajladılar ki, xəbərin içini oxumayanlar isə erməni Leşlərinə Rəhmət Oxudular...

“Məxfilik” adı ilə nəsə etməyimizə qadağalar qoyulur. Ancaq hər kəsin izlədiyi son videoya baxanda aydın oldu ki, məxfilik deyilən heç nə yoxdur. Kameralarla bizim postlar çox rahat görünür. Hələ bu azmış kimi, ermənilər öz postlarını da görüntüləməkdən çəkinmirlər.

Cənablar, gəlin “məxfilik” oyunu oynamayaq. Siz Ceyms Bondluğu özünüzə saxlayın, biz də Şerlok Holmsluq etməyək.

Səxavət Məmməd